بلاول ہاؤس کے ترجمان نے کہا ہے کہ پوری قوم کو پتہ ہے کہ کرپشن کیس میں نواز شریف کے بعد عمران کی باری ہے، اگلی باری آصف زرداری کی ضرور ہے لیکن حکومت کرنے کی، عمران خان اپنی خیر منائے کیوں کہ 62 اور 63 اب ان کی طرف آ رہا ہے۔ تحریک انصاف کے چیئرمین عمران خان کی جانب سے پیپلز پارٹی کی قیادت کے خلاف بیان پر ردعمل دیتے ہوئے ترجمان بلاول ہاؤس کا کہنا ہے کہ آصف زرداری پاکستان کے نیلسن منڈیلا ہیں اور انہیں کٹھ پتلی کی کوئی پرواہ نہیں ہے۔ ترجمان بلاول ہاؤس بیرسٹر مرتضیٰ وہاب کی جانب سے جاری بیان میں کہا گیا ہے کہ انہوں نے کہا کہ جس احتساب کا سامنا آصف علی زرداری نے کیا موجودہ سیاسی دور میں اس کی مثال نہیں ملتی، آصف زرداری ساڑھے 11 سال جیل کاٹ کر انہی عدالتوں سے بری ہو چکے ہیں، آصف زرداری کی زبان کاٹی گئی اور ان پر سخت تشدد کیا گیا لیکن کوئی ثبوت سامنے نہیں آیا۔ بیرسٹر مرتضیٰ وہاب نے کہا کہ عمران خان بدحواسی میں بیان دینا بند کریں، عمران خان یہ تاثر دینا چھوڑ دیں کہ ملک کے سب ادارے ان کی مٹھی میں بند ہیں۔
