تحریک انصاف کی منحرف رہنما اور رکن قومی اسمبلی عائشہ گلالئی نے عمران خان پر لگائے جانے والے سنگین الزامات کے بعد دھمکیاں ملنے پر سیکرٹری داخلہ کو خط لکھ دیا جس میں ان سے سیکورٹی دینے کا مطالبہ کیا ہے۔
ذرائع کے مطابق عائشہ گلالئی نے خط میں کہا کہ ان کی جان کو خطرہ ہے اور جان سے مارنے کی دھمکیاں مل رہی ہیں۔
خط میں کہا گیا ہے کہ سوشل میڈیا پر تیزاب پھینکنے کی دھمکیاں بھی دی جارہی ہیں اس لئے جلد سیکورٹی فراہم کی جائے۔
خیال رہے کہ یکم اگست کو عائشہ گلالئی نے ایک پریس کانفرنس میں عمران خان پر سنگین الزامات لگائے تھے جس کے بعد انہوں نے تحریک انصاف کو خیرباد کہنے کا اعلان کیاتھا۔
عائشہ گلالئی نے الزام لگایا تھا کہ تحریک انصاف میں پارٹی چیئرمین عمران خان کی وجہ سے ماؤں، بہنوں اور بیٹیوں کی عزت محفوظ نہیں ہے۔
خبر: جنگ
